الاثنين، 14 فبراير، 2011

حلول للشقق صغيره المساحه


 مهندسة الديكور رنيم سعيد المتخصصه في تصميم الشقق..

وبعض الأسئلة اللي تناسب المساحات المتواضعة اللي بتمثلها معظم شقق الشباب دلوقتي...


الأخشاب الطبيعية معروف إنها غالية قوي.. ما هي أنواع الأخشاب المصنعة والقريبة من الأخشاب الطبيعية؟
الأخشاب الطبيعية المصنعة لها استخدامات تختلف عن الأخرى والأخشاب الصناعية ممكن تكون أحسن من الطبيعية زي مثلاً (ضلف الدولاب الطويلة) خصوصاً إنها بتكون أوفر في التكلفة.
وأشهر الأخشاب الطبيعية "الأرو" و"الزان"، و"الأرو" أسهل في التشكيل وبه أنواع ودرجات...
وأفضل أنواع الزان هو "الزان الأحمر الروماني" وهناك أنواع أخرى من الخشب مثل "الخشب الماهوجني"، "البلاسندر" و"الجوزي"، وأفضل حل هو أنواع "خشب القشرة" التي تستخدم كلصق على الأخشاب المصنعة، وتعطي شكل الخشب الطبيعي بالظبط.


نصيحة مهندسة الديكور لاختيار أنواع أقمشة الأنتريهات تكون أنيقة وشيك وسعرها معقول؟
يوجد أنواع "الشلليا" المنتشرة في الموديلات المودرن، وفيه القماش السلك "الحرير" والقماش المشغول والقطيفة والجلود الطبيعية لكن هناك الأقمشة المصنعة الحديثة تشبه الشمواه بالظبط واسمها "مايكوفيبر"؛ لأن الشمواه غالي جدّاً، وبيكون سهل في التنظيف ومقاوم للبقع والسوائل وبقع المأكولات.
لكن لو فيه نوع من الأقمشة العادية غير مقاومة للبقع ممكن تعالج عن طريق رش الفرش بمواد كيماوية تقاوم أي بقايا أكل وأتربة وعصائر وبتعمل طبقة عزل حول القماش 




.

ما أحدث أرضيات الموضة دلوقتي غير السيراميك والرخام؟
أولاً اختيار الأرضيات سواء سيراميك أو رخام أو موكيت أو باركيه يرجع لذوق أصحاب المكان لكن أحدث الأرضيات دلوقتي وعليها إقبال كبير أرضيات (HPF) واللي انتشرت في الفترة الأخيرة لسهولة تنظيفها وأسعارها المعقولة، وسهولة تركيبها ويمكن خلعها وتركيبها في مكان آخر وهو مختلف خالص عن الباركيه الألماني؛ لأن الناس معتقدة إن (HPF) هو الباركيه الألماني لكن (HPF) هو خشب مصنّع ومجهز للتركيب مباشرة وبه ألوان كثيرة جدّاً 



.

 
أحدث أنواع السجاد المناسب؟
مش لازم كل الناس تلجأ إلى شراء السجاد الموجودة في السوق ولو فيه فكرة معينة تقدر تنفذها مع مهندس الديكور ويتناسب مع شكل الأثاث والأرضيات فمثلا في الصورة اللون البني هو السائد في شكل الأثاث فلازم يكون السجاد ألوانه مختلفة تماما عن البني زي الأصفر والأحمر ونقلل الحجم والمساحة بتاعة السجاد.
صور افكار جديده لديكورات الشقق الضيقة مع مهندس الديكور ,,ضياء,, في منتدى فتكات


 
وإيه أحدث أنواع الدهانات وهل ورق الحائط رجع موضة تاني؟
بالنسبة لورق الحائط فهو رجع موضة بأشكال جديدة ومختلفة زي ورق الحائط القطيفة والمعدن، وهناك أيضاً الخشب يستخدم كتجليد للحائط خصوصاً عندما يتوافق مع الأرضية والأثاث والسجاد.
لكن أحدث أنواع الدهانات هي دهانات (الأسبونش) لأنه به نقشات بسيطة وبألوان متناسقة مع بعضها.

 



هل السقف بيختلف عن الحوائط؟ وإيه الأشكال الإستايل لتصميم السقف؟
السقف طبعا بيختلف وفيه ناس تفضّل السقف الساقط سواء (الخيون بورد أو البلاطات) وفيه (السقف الحقيقي) المناسب للمساحات الصغيرة؛ لأن السقف الساقط يعطي إحساساً بالضيق، وكل ما كان الأثاث كلاسيك ممكن نقسم السقف بانوهات، ولو المكان مودرن يفضل ألا نقسم السقف.

 


معظم الشقق دلوقتي مساحة صغيرة ومثلاً عندي مكان واحد للأنتريه.. إزاي أزيد من عدد الكراسي علشان الضيوف؟
لو فيه أنتريه مكون من كنبة وأربعة كراسي ممكن أستغل (ترابيزة الوسط) وأضع بداخلها بوفات (كراسي من غير ظهر) وأستعمله لو فيه عدد كبير من الضيوف وفي نفس الوقت تكون مناسبة للأطفال وبيحبوها أكتر من كراسي الأنتريه نفسه، وكمان في نفس الوقت بتحمي الأنتريه وبتكون البوفات للاستهلاك.

 



إزاي أقلل من مساحة الأعمدة بالشقة؟
لا أستطيع أن أتخلص من الأعمدة؛ لأنها تضر سلامة المبنى لكن ممكن نجملها ونتحايل عليها يعني ممكن نجلدها بالمرايات أو الخشب أو الرخام، وهذه الطرق استهلكت، ولكن الأفضل والأحدث أني أستغل العمود كديكور يعني مثلا أعمل عامود مثله وأعمل بينهم (أرج) وأوصل بينهم وبين أقرب حائط وأعمل فتحة بشكل معين جمالي بيضاوي أو دائري أو مربع وأضع فيها إضاءة أو أنتيك وبكده أكون حولت العامود إلى ديكور.
صور افكار جديده لديكورات الشقق الضيقة مع مهندس الديكور ,,ضياء,, في منتدى فتكات

عايزة أعمل تحف في الأركان وترابيزات عليها فازات وأنتيكات من غير ما آخد مساحة؟
ألجأ في هذه الحالة إلى تصميم الديكور (الأراضي) وهو مناسب للمساحات الضيقة، وهي المسطحات الرئيسية في الحائط يعني آخد مساحة من الحائط وأصمم فكرة الفتحة وأضع بها أنتيكات أو تماثيل أو أباجورات، وممكن أعمل سبوت لايت يعمل إضاءة على الأنتيكات الموجودة.
إزاي أستغل الإضاءة كويس وبشكل يوسع مساحة الشقة؟
الإضاءة ليها فائدتين: إضاءة صريحة للمكان وإضاءة زينة، وعشان أحقق الهدفين مع بعض لا أعتمد على عنصر واحد، والإضاءة جزء من الإكسسوار وممكن أكتّر من إضاءات الزينة.

 

هل الإسبوت مناسب للمساحة الصغيرة؟
الإسبوت يتناسب أكثر مع السقف الساقط وهذا النوع من السقف لا يتناسب مع المساحات الضيقة وممكن أعمل حاجة زي (بيت نور) وهي دائرة حول الحائط بينها وبين السقف فراغ زي الكرانيش وغير ملتصقة بالسقف ويكون وراها الإضاءة وعادة تكون من لمبات فلوروسنت طويلة، وممكن تغني عن النجف بجانب بعض الأباجورات والأباليك كل ده يعطي ديكور ويوسع من شكل الشقة.

إزاي أعمل دولاب فضية كبير يستوعب جهاز العروسة من غير مساحة كبيرة؟
أي شقة يكون فيها أعمدة أستغل مكان العمود وأصمم بين الأعمدة دولاب فضية جوه الحائط، وبكده أكون قللت من مساحة دولاب الفضية مهما كان حجمه والأعمدة تكون اختفت كمان.

إزاي أستغل الفراغات في عمل ديكورات بسيطة؟
الديكور يعتمد على مكانه من الشقة يعني لو الفراغ موجود في مدخل الشقة ممكن أعمل كونسول (ترابيزة) صغيرة وأضع عليها متعلقات خاصة أو ورد صناعي أو مرايا، ولو الفراغ في الريسبشن أعمل كورنر صغير عبارة عن كرسيين وبينهم ترابيزة ولو جنب السفرة أضع ترابيزة الشاي لو موجود في غرفة المعيشة أعمل مكتبة تخزين، ولو في غرفة النوم أعمل جزامة
إزاي أختار الإكسسوار المناسب لتجميل الشقة؟
الإكسسوار مهم جدّاً وبعد ما أختار أساس الشقة وأفرشها أبدأ أختار الإكسسوار ولازم يكون موجود في كل مكان زي الفاز واللمبادير والتابلوهات والبراويز والصور والورود المجففة، ويفضّل إن الإكسسوار يكون مختلف عن أساس الشقة يعني لو الأساس بيج في بني لا بد من الإكسسوار يكون أخضر أو أصفر أو أحمر، ولو الأساس كلاسيك لازم أتوافق مع الخط العام يعني أعمل الإكسسوار من السيرما والفضيات والكريستال، ولو الأساس مودرن أضع نجف وأنتيكات وورود مجففة وأهم إكسسوار للحمام هو دولاب التخزين تحت الحوض بأشكاله المختلفة التي تستوعب كل محتويات الحمام وممكن أفصل بين الأنتريه والسفرة بدل الستارة بباب مبطن من الزجاج أو الخشب أو أعمل تحديد للخشب من نفس نوع الأساس تكون فاصل تحديدي بين السفرة والأنتريه زي اللي موجود في الصورة.

صور افكار جديده لديكورات الشقق الضيقة مع مهندس الديكور ,,ضياء,, في منتدى فتكات

 



الشيش أحسن ولا الألوميتال؟ وإيه أحدث أنواع الألومنيوم المفيدة صحيا؟
اختيار شيش أو الألوميتال يرجع لذوق الشخصيات، والشيش يحمي من أشعة الشمس، وأنا في رأيي إن الألومنيوم الآن أفضل؛ لأنه مصنع من قطاعات الألومنيوم عازلة للحرارة، وقادرة على عزل التراب والضوضاء حتى ولو من غير ستارة وهو عبارة عن ألومنيوم (الدبل جلاس) عبارة عن قطعتين زجاج، والهواء متفرغ بينهم، ويوجد أيضا في قطاعات الألومنيوم دلوقتي حاجة اسمها (الفونش) بيعمل على عزل التراب تماما من الشارع، ويوجد أيضا زجاج عاكس ملون لا يسمح بالرؤية لكن وجود ستارة خلف الألومنيوم يعطي شكلاً جمالياً، وده يرجع لذوق صاحب الشقة.    
هل ممكن أعمل دولاب تخزين ملابس (دريسنج روم) بدلا من الدولاب الأصلي بغرفة النوم وفي نفس الوقت يكون متوافق مع شكل الغرفة؟
معظم الناس دلوقتي بيختاروا غرف النوم بدون تسريحة وبتكون عبارة عن سرير و2 كومود والدولاب الدريسنج روم بيكون بحجم الغرفة شمال ويمين، ويضم كل محتويات التخزين من بطاطين وقمصان وبدل وفساتين وشرابات، وهو بديل عن الدولاب التقليدي لغرفة النوم، والكومود أصبح مجهز بشكل يستوعب كل الاحتياجات كما هو موجود بالصورة وبه مكان للنظارة والكتاب والأباجورة و وكل حاجة، وممكن أصمم دولاب دريسنج روم لوحده وأختار السرير والكومود المناسب معاه وأضع بداخل الدولاب سبوت إضائي بيعمل شكل جمالي بداخل الدولاب مع المرايات، وده يغني عن التسريحة وعلى فكرة دولاب الدريسنج روم بيتعمل عمولة على حسب المساحة.
صور افكار جديده لديكورات الشقق الضيقة مع مهندس الديكور ,,ضياء,, في منتدى فتكات

 

أخيراً هل ممكن أعمل مزْج بين الكلاسيك والمودرن داخل الشقة الصغيرة؟
 
مايعرف بانيوكلاسيك ممكن أمزج بين الكلاسيك والمودرن لكن الناس اللي بتحب الكلاسيك بتختار كل حاجة كلاسيك، والناس اللي بتحب المودرن بتختار كل حاجة مودرن، لكن قبل كل ده لازم أقلل من مساحة الأثاث ومش كل حاجة تعجبنا تكون مناسبة مع مساحة شقتنا، ولازم أعمل تناسق بين الألوان، ولازم أهتم بشكل الغرف؛ لأن فيه ناس بتهتم بالريسبشن على حساب باقي الغرف، ولازم استشارة مهندس الديكور حتى ولو كانت مساحة الشقة صغيرة.



‏ليست هناك تعليقات:

إرسال تعليق